Nog eine kier mit ’t ganse Meulewiekers boerebroèlofgezelschap, uhh Erme Tak, op paad um tiejes ’t boeremoosbal ’t kiendje te laote kièke. Maar um ‘t Boerebroèlofsjaor good en waerdig in “Meulewiekers-stiel” aaf te sloète huurt d’r netuurlik veuraaf auk un eige feesje beej, ’t Erme Takke Fees !

Ós residentie op ’t hukske van de Steinstraot waas laeggeruump want mier as 200 boere woorte vandaag vanaaf 4 oor verwach.  Ózze sirremoniemeister Mat hoot idderein welkom op ’t Erme Takke Fees en un speciaal woord van welkom waas d’r veur ’t boerebroèlofsgezelschap 2010 van FCV. Nao de (lekkere) boeremoos mit wors ging ’t ech loos. As ierste waas ’t de beurt aan de ein nao leukste joekskepel van Venlo um eur instrumente pièn te doon.

Daonao waas ’t officieële gedeilte van ’t Erme Takke Fees aangebraoke… Onder de melodie van “Wao is ’t kiendje dan” kwaam ózze eige pastoer Peeters ’t podium op um te gaon duipe. ’t Kiendje, gestaoke in ’t joekskepelle pekske van Hölster Heinke, kwaam in de erm van zien trotse onechte elders de residentie in, ohhhhh. Junior is geneump nao unne rauver dae zich opheelt rondum d’n Hölster (veurdet hae beej Manresa woort opgehange) en netuurlik de joekskepel wao broèd en broèdegom onderdeil van oètmake: Heinke. As Toffe Vors haet hae unne bizondere naam gekrege en wal dae van emus die weej op d’n daag van boeremoosbal 2004 hebbe mótte begrave, un zier geleefde vrouw binne de Meulewiekers die ós allemaol aan ’t hert ging: Vors Sobath II. Schoeën weurt woorte gespraoke en de duipacte woort mit de bode-pen onderteikend. Netuurlik waas d’r auk nog un borreltje um te prooste op ózze nieje Meulewieker ! Toepasselik woort daonao veur de ein nao letste kier, of waas ’t toch de letste kier “’t beste wies ’t lets bewaard” gezonge door Gerard en Marjon.

Bart had de poèt en ging dao mit zien vrinde euver zinge, “Gelache” woort d’r auk nog en Bram & Ruud ginge mit unne slinger de Alde Mert door. Span Herres, broor van Oscar, speulde as begeleidingskepel van FCV auk nog un deil leedjes. Ós Protocol Plus, ’t Klein Klein Gezelschap, sloot veur de Erme Tak ’t feesje aaf um veur de letste kier, of waas ’t de ein nao letste kier te zinge euver de slaag van de Meulewiek.De Erme Tak begoof zich richting Hoonderstal en Harie en Josefien ginge eur ondertrouwacte onderteikene en ophange in ’t dit jaor wal aanwezige kesje beej ós schoeën stadhoès.

Vors Joecius XI hoot idderein welkom en zoog al metein det broèd Joyce zwanger waas. Is d’r dan nog gen kièndje??? Netuurlik wal, nao un geweldig jaor hebbe broèd en broèdegom d’r genne boeremoos euver laote greuje en is d’n twiede blaag alweer op koms. Maar wao dae kleine bóksebaum waas wis nemus, in idder geval neet op podium van de Hoonderstal…

De Hofkepel zoot toepasselik “Wao is ’t kiendje dan” in en ózze sirremoniemeister leet de 2600 aanwezige boere en boerinne meizinge. Toen bijna idderein d’r neet mier in geluùfde en minse mit un muts zich opgelaote begóste te veule kwaam hae dan wal vanoèt de foyer te veurschieën, ózze Heinke, Vors Sobath II.

’t Kiendje waas d’r en nog eine kier woort ós leedje gezonge. De kinder, zoe as ’t huùrt, mit de kuit veuraan (en neet as podiumvulling) en ’t waas gedaon. Joyce en Pieter dronke nog un borreltje mit Harie en Josefien van ’t Ven en krege un kedootje gestoek. D’n bal woort geäöpend en de Erme Tak van de Meulewiekers begoof zich tösse de minse in de Hoonderstal um mei vastelaovend te viere.

Vastelaovendzondaag is ’t um 4 oor de beurt aan aan Isabelle & Mergen um eur kiendje te laote kieke (en wat veur ein kièndje) Same mit de res van ós Klein Klein Gezelschap én Hölster Heinke gaon zeej nao Jocus Pocus. Geej komp toch auk ff kièke?

Neet allein ózze hoffotograaf Ted haet zien fotocamera vasgehalde de aafgelaope vastelaovend en schoeën foto's gemak. Mierdere boere en boerinne hebbe wal 't ein en ander vasgelag op de geveulige (digitale) plaat.

As dich de aafgelaupe maonde un foto haes gemak wao van se dinks det dae absoluut op dees site gepubliceerd mót waere dan wuurs se vrintelik verzoch um dees in zo'n groeët meugelikke resolutie te versteure nao ós sikkertariaat. ( Dit e-mail adres is beschermd tegen spambots. U heeft Javascript nodig om het te kunnen zien. )
Van alle ingezonde foto's wuurt ein aparte map gemak in 't onderdeil Foto. Zoë hoof nemus iets te misse van die schoeën boerebroèlof van de Meulewiekers.

“The night after the day before” zulle weej deze aovend maar neume. Um 19.00 oor zoot ’t boerebroèlofsgezelschap in de normale kleijer (neh, neet de boerebroèlofskleijer) op de banke in de kerk in Zuùd. As good katholiek meus ’t assekruùtske gehaold waere. Op 't altaar loge weer die schoeën holte scepters van de trio's en dreejspanne oèt zuùd en de plastic windmeule van 't boerebroèlofsgezelschap. In un iets andere mis as de vastelaovesmis un gas waeke truuk woort idderein veurzeen van ’t assekruùtske en kós d’r begós waere mit ’t vaste.
 
Aete en drinke beej ós residentie stond d’r daonao op ’t program. Nog ff naopraote euver dae waandaag, waeke, maonde die weej mit zien alle hebbe meigemak. Idderein waas van meining det weej unne schoeëne tièd hebbe gehad en metein kwame d’r al ideeë op taofel veur as weej volgend jaor Erme Tak zien. Weej zien toch wal aan ózze status verplich um dan auk iets moèis d’r van te make. Ondertösse woort d’r genaote van lekkere kalde schaotel en un viske en netuurlik det letste glaas beer. Marc en Hans (de man van Yvon) hadde de gitaar meigebrach en un aantal leeje van ’t Boerebroèlofsgezelschap leete eur nachtegaal/Mieke van Kreij stum huuëre. Tja, de merks det un paar daag vastelaovend viere nogal wat impac haet op de stum. Laote weej ’t d’r maar op halde det ’t um ’t idee geit, de moèie klanke bedinke weej d’r wal beej. Marc had zelfs al un leedje klaor euver ’t verlaup van ózze boerebroèlof. Veur idderein dae deze gemis haet: mit de vreejwilligersdaag wuurt deze nog unne kier ten gehuùre gebrach. Umdet d’r waas aafgespraoke det nemus unne speech zoe gaeve noom Iezervraeter 2 en de veurzitter ’t woord um nogmaols idderein te bedanke. 

’T Absolute hoègtepunt van de aovend waas ’t oètroope van de Alde Mert Aswoensdaagprins. Zoe as idder jaor kreeg auk vanaovend dae kwante papeere prinsemuts op ziene bölt. De ier ging vanaovend oèt nao de vader van de um 00.00 oor jeurige broèdegom. Geert woort veur eine aovend heerser euver ’t Alde Mert rièk. Araaf, araaf, araaf !!!
 
Nog eine kier woorte d’r vastelaovesleedjes gespeult en meigezonge, nog eine kièr LUV, nog eine kier 't beste wies 't lets bewaard, nog eine kier sjoenkele, nog ein glaas beer…
 

De duitse WDR haet ôs Boérebroélof auk gefilmp en ôs schoene broédspaar haet auk nog ein intervieuw gegaeve. Niejschierig? Kiek dan ens heej um dit filmpke te bekieke.

Aafgespraoke waas det 't maondaag neet te laat zoe waere. As weej nao 20.00 oor eine voot in de Alde Mert zoeje zette dan waas Bill 't dae ós nao boète zoe vaege. Toch probere... en inderdaad, de boerebroèlofsmars klonk oèt de boxe en metein had de broèdegom unne erm in ziene nek. Weej meuste nao boète. Toen stiekum toch maar aan ein van de boète bars op ós residentiestraot un pilske bestelle. Um 00.00 oor loge weej in bed en kóste weej nog ff oètröste veur " 't beste wies 't lets bewaard ". Um 4 oor woort de broèdegom wakker en waas hae d'r klaor veur. Nog gen 150 maeter wiejer waas 't de broèd die 't zelfde dach.

't Klein gezelschap verzamelde zich beej de broèdegom en 't waas nog duùster. Same un bruuëdje aete en alvas babbele wie 't d'r sraks wellich oèt zoe zeen. Rond 07.30 oor woort de broèd muzikaal door de ein nao leukste joekskepel van venlo mit broèdegom opgehaold en woort d'r netuurlik eine Jägermeister gedronke, en eine twieëde. Kiepevel... De ganse straot waas ondertösse wakker gewaore van die schoeën klanke. Idderein kreeg veur de letste kier un laog schmink en bus 11 "vastelaovesexpress" brach ós nao hertje stad. 't groeët gezelschap waas auk al un pilske aan 't drinke en de Meule waas d'r klaor veur !!!

De Koffietuiterie waas wie te werm dao baove op de 2e verdeeping maar 't Krense stond alweer veur de deur. Alle vastelaovesgezelschappe kwame ós felicitere en complimentere mit die schoeën boerebroèlof. Maar auk 't Krense vloog veurbeej, det ware twieë snelle aore. René van de Kwas waas un kièpevelmoment en netuurlik veur intimi "Veur Pap...uhh Pieter". Veur weej 't wiste waas de kinderwage van Jos en Tineke al gepasseerd en meuste weej ós in 't artiestefoyer van de Hoonderstal ff aafkeule en ós van un nieje laog schmink laote veurzeen. 10.000 kösmuuëlkes haet toch wal impac op ós "netuurlik" broeëne kleur. 

D'n optoch. Tja, dao hebbe weej 't al dökker euver gehad mit ald broèdspare. D'n bóch beej de Klaosstraot... Waat ein volk waas d'r op de bein. Al ierder krege weej te huuëre det 't vol waas op ós mertplein dao beej ós stadhoès, weej stonde toen nog te zweije taege etalagepoppe op de Vleisstraot, en det d'r wellich gen kerre 't mertplein op mochte. Un cameraploeg van de WDR van euver de peul kwaam auk nog ff veurbeej en weej vertelde euver de "Bauerhochzeit" en de Hühnerhaut-momente. De Parade, metein nao d'n baog, waas eine werme douche. Christian, ald broèd van Venlostad.com, stond midde op de straot klaor mit un fles champagne en det waas harstikke tof. Eine toos en toen wiejer de massa in. Rieje diek stond 't dao en idderein waas in vastelaovessfeere, boerebroèlofsfeere. De koetsier reej steeds 10 maeter en ging daonao 3 minute pauzere. 't beste wies 't lets bewaard.....

Leef Venlonaere, dit waas hartstikke wauw, te gek, en neum maar op. Noèits zulle weej det vergaete. De "klungel" woort ingezatte en idderein, en ech werkelik idderein, deej mei. Maar good det weej um de 10 maeter stopte, Wim bedank !!!

Veur 't stadhoès waas 't te drök en kóste weej neet mit de kerre veur 't stadhoès komme. Erg tof, un vol mertplein veur zo'n schoeën gezelschap... Holladiejeeja, 't plein waas vol, beej Jamin stonde de minse zelfs nog te kièke. Zal wal mit 't gooje weer van doon hebbe of toch mit die boere oèt Zuùd? De trouwerie waas aaf en weej zien noow in de onech verbonde!!! Kiepevel.

In 't stadhoès woort d'r tiejes de receptie van de gemeinte op de kis gehouwe en toen ging 't weer nao boète. In ós schoeën stad waas 't ondertösse al duuster en ging 't snel richting de Steinstraot um un traditie in ière te halde. De bar beej te Alde Mert kwaam vol mit Jägermeister te staon en weej mochte/meuste d'r aan drinke. Hölster Heinke houwde op die kis.

Snel woort d'r gegaete en op de pleej van Baer de Woers ginge d'n broèdegom 2008 én 2009 mit elkaar in d'n onech.

Daag, waeke neh maonde woort d'r al nao dit moment oètgekeke. 't Muts aafzette. 't Zoe gegarandeerd, net wie andere jaore, neet druùg blieve beej ós echte vastelaovesvierder van de Meulewiekers. De ierste twieë leedjes ging nog wal maar daonao kwame de echte traone trekkers, helaas neet "Onech". Jao det had wal wat. Same mit Joep hand in hand, of waas 't noow erm in erm op 't bordes. Weej as broèdspaar dachte aan al die momente die weej aafgelaupe tièd mit elkaar hebbe mei gemak en vaegde unne traon weg. Idderein had 't d'r zwaor mei want weej neme noow aafscheid van iets wat weej ós nog hiel lang gaon herinnere (en geej ziet d'r allemaol de schöld van).

Nog eine drinke en zoe kwaam se idderein van 't boerebroèlofsgezelschap weer taege en woort d'r un hendje geschöd, unne kös en unne knoèvel gegaeve. 't Letste pilske woort getap en zoe kwaam (bijna) un ind aan ózze letste daag.

Ondertösse ware weej thoès op de boerderie in Zuùd aangekomme en toch nog maar eine koffie en iets lekkers daobeej kloeke mit de onechte vrouw en de echte broèd. D'n Umroop leet un reportage zeen vanoèt de auge van ózze sirremoniemiester Knoers. 't woort later en de Tante Bet veel op de deurmat en dao steit ein schoeën foto vanaaf 't bordes mit un vol mertplein op. Zelf hebbe we nog un videoopname in de hoèskamer gemak en dees kint ge morge (as de nachkesjes neet mier zweve), gaon bekièke op internet.

Ik wil neet nao bed gaon want dan is 't aafgelaupe. Dan is d'r genne boerebroèlof 2009 mier. Dan kin ik morgeaovend allein nog maar spraeke euver "gister" en d'r allein nog maar euver druime. Maar ik weit auk det 't good is det weej noow zo'n geveul hebbe want dan hebbe weej auk iets moèis meigemak en achtergelaote. Iets wat weej noèits maar dan auk ECH noèits (traon velt op de wang) zulle vergaete !!!

06.44 oor, misschien toch maar gaon slaope... 't beste wies 't lets bewaard,

Venlo bedank !

Boerebroèlof same